വ്യാഴത്തിന്റെ അപരനെ കണ്ടെത്തി !

3 years, 4 months Ago | 324 Views

സൗരയൂഥത്തിൽ നിന്ന് വളരെ അകലയുള്ള നക്ഷത്ര സമൂഹത്തിൽ വ്യാഴത്തിന് സമാനമായ ഒരു പുതിയ ഗ്രഹത്തെ കണ്ടെത്തിയിരിക്കുകയാണ് ശാസ്ത്രജ്ഞർ. ' TOI - 2189 b' എന്നാണ് ഈ ഗ്രഹത്തിന് നൽകിയിരിക്കുന്ന പേര്. സൂര്യനെ ചുറ്റാൻ 261 ദിവസങ്ങൾ വേണം ഈ ഗ്രഹത്തിന് .പുറത്ത് കണ്ടെത്തുന്ന വാതക ഭീമൻ ഗ്രഹങ്ങളിൽ വളരെ വലിയ ഗണത്തിൽപ്പെടുന്നതാണ് TOI - 2189 b.  ഏകദേശം 379 പ്രകാശ വർഷം അകലെയാണ് TOI - 2189 bയുടെ സ്ഥാനമെന്ന് കരുതുന്നു.  അടുത്തിടെ കണ്ടെത്തിയിട്ടുള്ള വിദൂര ഗ്രഹങ്ങളിൽ ഭൂമിയോട് ഏറ്റവും അടുത്ത് നിൽക്കുന്നതാണിത്. 

നാസയുടെ ട്രാൻസിറ്റിംഗ് എക്സോപ്ലാനറ്റ് സർവേ സാറ്റലൈറ്റ് ( ടെസ് ) ആണ് TOI - 2189 bയെ കണ്ടെത്തിയത്. അതേ സമയം, TOI - 2189 bയുടെ ഭ്രമണപഥത്തെ സംബന്ധിച്ച് വ്യക്തത ലഭിച്ചിട്ടില്ല. വ്യാഴത്തോളം വലിപ്പമുണ്ടെങ്കിലും വ്യാഴത്തേക്കാൾ മൂന്നിരട്ടി സാന്ദ്രതയുണ്ട് TOI - 2189 bയ്ക്ക്. വ്യാഴത്തിൽ നിന്ന് വളരെ വ്യത്യസ്തമായ രീതിയിലാണ് ഈ ഗ്രഹത്തിന്റെ ഉത്ഭവമെന്നാണ് ഇത് സൂചിപ്പിക്കുന്നത്.  77 ഡിഗ്രി സെൽഷ്യസാണ് TOI - 2189 bയിലെ താപനില.  TOI - 2189 bയെ ചുറ്റി വാതക വലയങ്ങളോ ഉപഗ്രഹങ്ങളോ ഉണ്ടോ എന്ന ഗവേഷണത്തിലാണ് ശാസ്ത്രലോകം.