നൂറില്‍ നൂറ്​; വാക്​സിനേഷനില്‍ ചരിത്രം കുറിച്ച്‌ ഒഡീഷ നഗരം

4 years, 10 months Ago | 518 Views

രാജ്യത്ത്​ എല്ലാവര്‍ക്കും ആദ്യഡോസ്​ വാക്​സിന്‍ നല്‍കിയ ആദ്യ നഗരമായി ഒഡീഷയിലെ ഭുവനേശ്വര്‍. സ്​ഥിര താമസക്കാരെ കൂടാതെ ഒരു ലക്ഷത്തോളം കുടിയേറ്റ തൊഴിലാളികള്‍ക്കും വാക്​സി​ന്റെ ആദ്യ ഡോസ്​ നല്‍കി ഇവിടെ.

'കോവിഡ്​ 19 പ്രതിരോധ വാക്​സിന്‍ നഗരത്തിലെ 100 ശതമാനം പേരും സ്വീകരിച്ചു. ഇത്​ കൂടാതെ, കുടിയേറ്റ തൊഴിലാളികളായ ഒരു ലക്ഷം പേര്‍ക്കും വാക്​സിന്‍ നല്‍കി' -ഭുവനേശ്വര്‍ മുനിസിപ്പല്‍ കോര്‍പറേഷന്‍ ഡെപ്യൂട്ടി കമീഷണര്‍ അന്‍ഷുമന്‍ രാത്ത്​ പറയുന്നു.

ജൂലൈ 31നകം എല്ലാവര്‍ക്കും വാക്​സിന്‍ ലഭ്യമാക്കുകയെന്ന ലക്ഷ്യത്തോടെയായിരുന്നു അധികൃതരുടെ പ്രവര്‍ത്തനം. എല്ലാവര്‍ക്കും ആദ്യ ഡോസ്​ നല്‍കിയതിനൊപ്പം 9,07,000 പേര്‍ക്ക്​ രണ്ടാംഘട്ട വാക്​സിനും നല്‍കിയതായി അധികൃതര്‍ പറയുന്നു. ജൂലൈ 30 വരെ 18,35,000 ഡോസ്​ വാക്​സിന്‍ വിതരണം ചെയ്​തു.

നഗരത്തില്‍ മാത്രം 55 സെന്‍ററുകളിലായിരുന്നു വാക്​സിന്‍ വിതരണം. അതില്‍ 30 എണ്ണം പ്രാഥമിക ആരോഗ്യ കേന്ദ്രങ്ങളിലും കമ്യൂണിറ്റി സെന്‍ററുകളിലുമായിരുന്നു ഒരുക്കിയിരുന്നത്​. വാഹനങ്ങളിലായി 10 വാക്​സിനേഷന്‍ കേന്ദ്രങ്ങള്‍ ഒരുക്കി. കൂടാതെ സ്​കൂളുകളില്‍ 15 എണ്ണം തയാറാക്കി ഭിന്നശേഷിക്കാര്‍ക്കും മുതിര്‍ന്നവര്‍ക്കും സൗകര്യമൊരുക്കി.

മടികൂടാതെ വാക്​സിന്‍ സ്വീകരിക്കാന്‍ തയാറായ എല്ലാവര്‍ക്കും നന്ദി രേഖ​പ്പെടുത്തുന്നതായും ഡെപ്യൂട്ടി കമീഷണര്‍ പറഞ്ഞു.