ലോകചാമ്പ്യനെ തകര്‍ത്ത് ലക്ഷ്യ സെന്നിന് ഇന്ത്യ ഓപ്പണ്‍ ബാഡ്മിന്റണ്‍ കിരീടം

3 years, 6 months Ago | 291 Views

ഇന്ത്യ ഓപ്പൺ ബാഡ്മിന്റൺ കിരീടം സ്വന്തമാക്കി ഇന്ത്യയുടെ യുവതാരം ലക്ഷ്യസെൻ. ഫൈനലിൽ ലോക ചാമ്പ്യൻ സിങ്കപ്പൂരിന്റെ ലോ കീൻ യൂവിനെ തകർത്താണ് താരത്തിന്റെ കിരീട നേട്ടം. ഇതോടെ ഇന്ത്യ ഓപ്പണിലെ തന്റെ അരങ്ങേറ്റ ടൂർണമെന്റിൽ തന്നെ പുരുഷ സിംഗിൾസ് കിരീടജേതാവാകുന്ന ആദ്യ ഇന്ത്യൻ താരമെന്ന നേട്ടവും ലക്ഷ്യ സ്വന്തമാക്കി.

ഞായറാഴ്ച നടന്ന ഫൈനലിൽ സിങ്കപ്പൂരിന്റെ ലോ കീൻ യൂവിനെ നേരിട്ടുള്ള ഗെയിമുകൾക്ക് പരാജയപ്പെടുത്തിയാണ് ലോക ചാമ്പ്യൻഷിപ്പിലെ വെങ്കല മെഡൽ ജേതാവ് കൂടിയായ ലക്ഷ്യയുടെ കിരീട നേട്ടം. സ്കോർ: 24-22, 21-17. മത്സരം 54 മിനിറ്റ് നീണ്ടുനിന്നു.

പുരുഷ ഡബിൾസിൽ ഇന്ത്യയുടെ സാത്വിക് സായ് രാജ് റങ്കിറെഡ്ഡി- ചിരാഗ് ഷെട്ടി സഖ്യവും കപ്പുയർത്തിയതോടെ ഇരട്ടിമധുരമായി. മൂന്നുതവണ ലോക കിരീടം നേടിയിട്ടുള്ള ഇൻഡൊനീഷ്യയുടെ മുഹമ്മദ് അഹ്സാൻ- ഹെൻഡ്ര സെറ്റിയാവാൻ സഖ്യത്തെയാണ് കീഴടക്കിയത് (21-16, 26-24).

20-കാരനായ ലക്ഷ്യസെന്നിന്റെ ആദ്യ സൂപ്പർ 500 കിരീടം കൂടിയാണിത്. ലോകചാമ്പ്യൻഷിപ്പിൽ വെങ്കലം നേടിയ ലക്ഷ്യ അതേ ഫോം നിലനിർത്തിയാണ് കിരീടം സ്വന്തമാക്കിയത്. ആദ്യ ഗെയിമിൽ കടുത്തപോരാട്ടം നേരിട്ട ലക്ഷ്യ രണ്ടാം ഗെയിമിൽ അനായാസം വിജയത്തിലേക്കെത്തി.